ဒအ်ဝဟ်နှင့် မြန်မာနိုင်ငံ

March 16, 2009 by Admin

ဒအ်ဝဟ်နှင့် မြန်မာနိုင်ငံဟူသောခေါင်းစဉ်ဖြင့် စာတမ်းတွင် အခန်း(၂)ခန်းခွဲ၍ ရေးသားထားပါသည်။ အခန်း(၁)တွင် အခြားဘာသာများ၏ အစ္စလာမ်အပေါ် နားမလည်မှုများနှင့် အထင်အမြင်လွဲမှားမှုများကို ဒအ်ဝဟ်ဖိတ်ခေါ်သူများအား အဓိက မေးခွန်းထုတ်ခြင်းခံရသော အကြောင်းအရာများကို ရှင်းလင်းတင်ပြထား၍ အခန်း(၂)တွင်မူ ဒအ်ဝဟ်ဖိတ်ခေါ်ရာတွင် လုပ်ဆောင်သင့်သော လုပ်ငန်းစဉ်များမှ အချို့ကို တင်ပြထားပါသည်။

‘‘ ဒအ်ဝဟ်နှင့် မြန်မာနိုင်ငံ’’

ကျေးဇူးတော်အစုံ ဂုဏ်တော် အနန္တနှင့်ပြည့်စုံ၍ စကြ၀ဠာအဆင့်ဆင့်ကို ပြုစုပျိုးထောင် ဖန်ဆင်းတော်မူသော မပြတ်မစဲ သနားကြင်နာတော်မူသော အလ္လာဟ်အရှင်မြတ်၏ နာမတော်ဖြင့် အစပြုပါ၏။

နိဒါန်း

          ကျွန်ုပ်တို့သည် အမိမြန်မာနိုင်ငံအတွင်း မှီတင်းနေထိုင်ကြသော တိုင်းရင်းသား အစ္စလာမ် သာသနာဝင်များ ဖြစ်ကြလေသည်။ ကျွန်ုပ်တို့ယုံကြည်မြတ်နိုးကြသော အလ္လာဟ်အရှင်မြတ်၏ သာသနာဖြစ်သော အစ္စလာမ်သာသနာသည် မြန်မာနိုင်ငံသို့ လွန်ခဲ့သော နှစ်ပေါင်းတစ်ထောင်ကျော်က စတင်ရောက်ရှိလာခဲ့ခြင်းဖြစ်သည်။ အစ္စလာမ်သာသနာ မြန်မာနိုင်ငံသို့ ရောက်ရှိလာပုံမှာ ပြည်ပအစ္စလာမ် သာသနာပြုအဖွဲ့များက မြန်မာနိုင်ငံသို့ လာရောက်သာသနာပြုသဖြင့် ရောက်ရှိခဲ့ခြင်းမျိုးမဟုတ်ပေ။ အေဒီ ၇၀၀ နှင့် ၁၅၀၀ ကြားတွင် အာရဗ်ကုန်သည်၊ ပါရှန်းကုန်သည်နှင့် ရောမ ကုန်သည်တို့သည် မိမိတို့တိုင်းပြည်များမှ ရွက်သင်္ဘောများဖြင့် မြန်မာနိုင်ငံ ပင်လယ်ကမ်းရိုးတန်းကို လည်းကောင်း၊ အရှေ့ဘက် တရုတ်ပြည်ကမ်းခြေများသို့လည်းကောင်း ကူးသန်းရောင်းဝယ်ရေးအတွက် လာရောက်ခဲ့ကြခြင်းဖြင့် အစ္စလာမ်သာသနာသည် မြန်မာနိုင်ငံသို့ ရောက်ရှိခဲ့လေသည်။

          မြန်မာဘုရင်များလက်ထက်တွင် အစ္စလာမ်သာသနာဝင် တိုင်းရင်းသားများအဖြစ် အသိအမှတ်ပြုခဲ့ကာ လုပ်မြေ၊ နေမြေများချထားပေးခဲ့ပြီး နိုင်ငံတော်ကာကွယ်ရေးအတွက် လိုအပ်လာလျှင် မြန်မာဘုရင်က လက်နက်များ ထုတ်ပေးကာ စစ်မြေပြင်သို့ထွက်၍ တိုက်ခိုက်ခဲ့ရသည်။ အချို့သူများကို အုပ်ချုပ်ရေး၊ အချို့အား စီးပွားရေး၊ အချို့အား ဘုရင်၏ ကိုယ်ရံတော် စသည်ဖြင့် တာဝန်ပေးခြင်းခံခဲ့ကြရသည်။ မြန်မာဘုရင်များ အဆက်ဆက်တွင် တိုင်းရင်းသား အစ္စလာမ်သာသနာဝင်များသည် သာသနာရေးရာများတွင် တာဝန်ကျေပွန် ခဲ့ကြသည့်နည်းတူ ဘုရင့်အမှုတော်ထမ်းရွက်ရာတွင် ထူးချွန်ခဲ့ကြသည်။ ဘိုးတော်ဘုရားလက်ထက်တွင် အစ္စလာမ်သာသနာဝင် ဆရာကြီးဦးနုသည် အစ္စလာမ်သာသနာအကြောင်းကို ဘုရင်မင်းမြတ် သိရှိနားလည်နိုင် စေရန် ‘သံတော်ဦးတင်လွှာကျမ်း’ကို ရေးသားတင်သွင်းခဲ့သည်။ ယင်းသို့ တင်သွင်းရာတွင် အခြားဘာသာများအား ထိပါးပုတ်ခတ်မှု လုံးဝမရှိစေပဲ မိမိသာသနာအကြောင်းကို နားလည်စေရန်သာ တင်ပြခဲ့ ခြင်းဖြစ်သည်။ ဤသည်မှာ ဆရာကြီးဦးနု၏ ဒအ်ဝဟ်လုပ်ငန်းစဉ်တစ်ရပ်ပင်ဖြစ်သည်။

          ကျမ်းတော်မြတ်ကုရ်အာန် (၂း၁၅၉)တွင် ‘ငါအရှင်သည် ထင်ရှားသော သက်သေနှင့် တရားလမ်းညွှန်ကို ထုတ်ပြန်ချမှတ်ခဲ့၏။ လူအများသိနားလည်ရန် ထိုသက်သေလက္ခဏာနှင့် တရားမျာားကို ငါအရှင်မြတ်သည် ကျမ်းဂန်၌ ပွင့်လင်းစွာ ဖွင့်ဟမြွက်ကြားတော်မူ၏။ ယင်းပွင့်လင်းစွာ ဖွင့်ဟရှင်းပြထားသော သက်သေလက္ခဏာ နှင့် တရားလမ်းညွှန်တို့ကို အချို့လူများသည် ထိန်ချန်ကြ၏။ အလ္လာဟ်အရှင်မြတ်သည် ထိုသူတို့အား ကရုဏာတော်မှ ကင်းဝေးစေတော်မူသည်။’ဟု ပါရှိပေရာ ဒအ်ဝဟ်လုပ်ငန်းသည် မွတ်စလင်မ်တိုင်းအတွက် တာဝန်တစ်ရပ်ပင်ဖြစ်သည်။

          ယနေ့အချိန်ကာလ မြန်မာနိုင်ငံတွင် အစ္စလာမ်သာသနာအား နားလည်မှုလွဲခြင်းနှင့် အထင်အမြင်လွဲမှားမှု များစွာရှိနေသည်။ ဤကဲ့သို့သော အထင်အမြင်လွဲမှားမှုများကို ဖြေရှင်းနိုင်ရန် ‘ဒအ်ဝဟ်’ လုပ်ငန်းစဉ်ဖြင့် ကြိုးပမ်းဆောင်ရွက်ကြရပေမည်။ ဒအ်ဝဟ်ဖိတ်ခေါ်မှု လုပ်ငန်းများကို ကုရ်အာန်နှင့် တမန်တော်မြတ်၏ စံနမူနာများဖြင့် အစွဲကင်းစွာ တိုင်းရင်းသား နိုင်ငံသား ပီသမှုဖြင့် ဆောင်ရွက်ပြီး စည်းလုံး ညီညွတ်ရေးကို ဦးစားပေးရမည်ဖြစ်သည်။

Permalink